السؤال الاول من Sally Awad بيقول : الشركة حاطة شرط يمنع الطرف التاني اللي هو انا من عمل اي توكيل خاص لاي شخص قبل سداد كامل الثمن والا ويعتبر العقد مفسوخ من تلقاء نفسه

 

عاوزة نصيحتكم ضروري علي وجه السرعة
بنتعاقد علي شقة في القاهرة الجديدة .. الشركة حاطة شرط في العقد بتمنعنا من عمل اي توكيل خاص بالتصرف الا بعد سداد كامل الثمن والا يعتبر العقد مفسوخ من تلقاء نفسة
يا تري ايه هدفهم من كدة .. وهل حد واجهته المشكلة زي كده ..وهل أتمسك برفض الشرط ده
شكرًا جزيلا

 

الاجابة : Omar F Mostafa ده حقهم عشان حضرتك متبعيش الشقة أو تتصرفي غير لما تسددي تمنها ده شئ طبيعي .

 

Ehab Ahmed الشرط ده حق الشركه لأن حضرتك بتشترى تقسيط فمن حقهم يمنعوا البيع إلا بعد سداد كامل ثمن الشقة

 

Sally Awad انا مش معترضة علي حقهم في اعادة البيع وانه لازم يكون عن طريقهم .. أوكي
لكن ليه يمنع اعمل توكيل لاي شخص يتصرف بالنيابة عني .. افرض مسافرة او اي ظروف

 

Ehab Ahmed طيب تمام لو على اداره الشقه حضرتك ممكن تطلبى منهم توكيل إدارة فقط مش توكيل بيع وفى الحاله ديه ممكن يوفقوا أن شاء الله

 

Sherif F. ElSoudy هدفهم ان حضرتك متبيعيش شقة لسه مش ملكك ومدفعتيش تمنها.

 

Mostafa Khalid مينفعش يفندم تعملي توكيل…لان بكده انتقلت الملكيه ليه…وحضرتك لسه عليكي فلوس للشركه…لكن ممكن تبيعي وبالتالي يكون عن طريق التنازل ف الشركه وبتاخد رسوم مقابل التنازل

 

Ahmed Kadry طبيعي لان حضرتك عليكي لسه اقساط علي الشقة ودة اسمها حق تميز للشركة بتمنع حضرتك بالبيع للشقه او عمل توكيلات بالبيع فيها الي سداد كامل الثمن
زي العربية لما بتشتريها من البنك بيعملك عليها حظر بيع حتي سداد كامل الثمن

 

MU-stafa A. Mohamed ده طبيعي في كل الشركات والعقود وده حق الشركه بس ممكن حضرتك تروحي الشركه وبتعملي تنازل مقابل مصاريف محدده من الشركه

 

Abdelfattah Essam تقدري تعملي توكيل عام رسمي للي حضرتك عايزاه يتصرف نيابة عن حضرتك بس هيبقي عن كل حاجة

 

Ahmedd Fathy ده طبيعي وحق الشركة انها تعمل كده

 

Maged Zarief معاهم حق ويحمى اى حد يشترى بتوكيل وينصب على مالك حديد ويبيع الوحدة لاكثر من واحد
..بصراحة شرط جيد .

 

HA MA DA طبيعى جدا ومعاهم حق طبعا

 

Karim Abdin واضح ان حضرتك تقصدي تعملي توكيل لحد بالادارة مش بالبيع
لو طلبتي منهم كدا ممكن يوافقوا بس توكيل بالبيع حقهم ميوافقوش

 

Sally Awad انا مجبتش سيرة البيع خالص 😊
توكيل لحد يشوف مصالحي يستلم الشقة بالنيابة عني ويمثلني اما اي جهه في غيابي

 

Ahmed Gamal ده شئ قانوني وطبيعي لازم يتم سداد كامل الثمن حتى يتثنى لكي نقل الملكية لنفسك أو للغير ويتم عمل توكيل

 

Sally Awad انا مش عايزة ابيع .. عاوزة يبقي لي الحق اعمل توكيل خاص لاي حد يشوف مصالحي ويتعامل مع الشركة او الجهات الرسمية بالنيابة عني

 

Ahmed Gamal ده مش محتاج إذن من الشركة ده ممكن حضرتك تعمليه عادي
هيكون توكيل عام أو خاص بالتعامل مع كذا وكذا بخصوص كذا

 

Sally Awad الشركة حاطه شرط في العقد يمنع اني اعمل اي توكيل خاص

 

Ahmed Gamal
Sally Awad هو حاجة غير قانونية وفيها تزمد شوية من الشركة طالما إن التعامل ده مفيهوش بيع ولا تصرف لكن ممكن يستلم الوحدة مكانك أو يوقع على العقد الخالص الثمن بإسمك بموجب التوكيل

 

Ahmed Gamal
المنطق بيقول كدة ده حتي ضد حقوق الانسان كل واحد حر يوكل اللي ينوب عنه

 

ياسر بدوي هو حضرتك عاوزه تعملي توكيل لاخوك انه يتصرف بالنيابة عنك وله عاوزه الشركة تعملك انت توكيل

 

Sally Awad لاخويا يتصرف بانيابة عني ويتعامل مع الشركة بالنيابة عني ويستلم بالنيابة عني

 

ياسر بدوي
Sally Awad اعملي التوكيل عادى جدا وماحدش يقدر يمنعك من كده

 

Helmy Younes معظم الشريكات كدة دلوقتي

 

ياسر بدوي لو حضرتك عاوزه تعملي توكيل لاخوك مافيش ادنى مشكله ولو عاوزه الشركة اللي تعملك توكيل ده مش هينفع اللي بعد سداد كامل المبلغ

 

Sally Awad واضح السؤال بتاعي اتفهم غلط .. انا مش عايزة اي توكيلا من الشركة .. انا عايزة يبقي لي الحق اعمل توكيل خاص لاخويا .. والشركة مانعة كدة وبتعتبرة شرط فاسخ للعقد

 

HA MA DA لا يافندم مافيش حاجة اسمها كدة من حق حضرتك تعملى توكيل لاى شخص يتعامل نيابة عنك اكيد جضرتك فهمتى البند غلط ؟؟ ممكن تصورى البند دة من العقد يافندم

 

Sally Awad حضرتك تعملي توكيل لاى حد بس يبقي بالتعامل فقط وتوقيع عقود وتعامل مع جهات حكومية وكهرباء ومياه والتعامل مع الشركة نفسها بخصوص الوحدة وتكتبي بيانات الشقة في التوكيل

 

Sally Awad معنديش مشكلة بس التخوف من شرط الشركة لانهم كاتبين اي توكيل خاص محددوش حتي نوع التوكيل بالإدارة او غيره

 

ياسر بدوي حضرتك ممكن تصوري البند ده في العقد وان شاءالله اقدر اساعد حضرتك

 

Sahar Amin الشركة رافضة تديكي توكيل قبل سداد كامل الثمن من حقها
اما الشركة تمنعك من انك تعملي توكيل خاص لاي شخص من طرفك .. ده أسمة بلطجة وفُجر
حضرتك تقصدي ايه بالظبط

 

Sally Awad الشركة حاطه شرط يمنع الطرف الثاني اللي هو انا من عمل اي توكيل خاص بالتصرف في الوحدة الا يعتبر العقد مفسوخ من تلقاء نفسه

 

Marwa Mohamed
Sally Awad البند ده بيكون موجود في كل عقود الشركات العقاريه و معني التصرف في الوحده يقصدو بيه البيع او التنازل
إنما اللي حضرتك محتاجاه توكيل إداري لاداره ما يخص الشقه وهي بإسمك بدون التصرف فيها.. وده عادي جدااا لا يمنعه نص البند ده في العقد اطلاقا

 

Marwa Mohamed
Sally Awad البند ده بيكون موجود في كل عقود الشركات العقاريه و معني التصرف في الوحده يقصدو بيه البيع او التنازل
إنما اللي حضرتك محتاجاه توكيل إداري لاداره ما يخص الشقه وهي بإسمك بدون التصرف فيها.. وده عادي جدااا لا يمنعه نص البند ده في العقد اطلاقا

 

Sally Awad
Marwa Mohamed
هل التوكيل الاداري يخلي اي حد يستلم الشقة بالنيابة عني او يتعامل مع الشركة والجهات الرسمية بالنيابية عني ؟ او حتي يبيع عن طريق الشركة بالنيابة عني ؟

 

Marwa Mohamed
Sally Awad ايوه يا فاندم كل اللي حضرتك قولتيه ماعدا يبيع
يدير الشقه فقط من استلام وتعامل مع جهات حكوميه وغير حكوميه واي شئ انتي عايزاه اكتبيه في نص التوكيل
ولكن التوكيل الإداري لا يعطي لصاحبه حق البيع نيابه عن صاحب الشقه

 

Zaki Ahmed Ali يا افندم ما ينفعش اولا تعملي توكيل بيع في حاجه انت لسه لم تمتلكيها الا بسداد كامل الثمن علشان هو اصلا يسهلك او يعملك توكيل ،، ثانيا ما ينفعش ابقى متعاقد معاكي النهارده كطرف اول وانت طرف ثاني واجي بكره الاقي الطرف الثاني اتغير مع نفسه ،، وده مش في مصلحتك كمان لو انت عامله شيكات بباقي ثمن الشقه

 

Sally Awad مين جاب سيرة توكيل بيع ؟ الشركة مانعة الطرف الثاني من عمل توكيل خاص

 

Zaki Ahmed Ali
Sally Awad توكيل خاص بايه يا افندم ؟؟ يعني هيعمل ايه الموكل بالتوكيل ؟؟

 

Sally Awad توكيل خاص يدي لليهعملهوله الحق استلام الشقة والتعامل مع الجهات الرسمية وأي تصرف خاص بالشقة او بيعها من خلال الشركة
لو حبيت أبيعها من خلال الشركة مش لازم انزل بتفسي علشان اخلص الأمور دي

 

Moataz Ghobara اوعي تقبلي البند ده … حاولوا معايا ولما رفضت و لغيت التعاقد قعدوا معايا و غيروا العقد

 

Sally Awad
Moataz Ghobara
هدفهم ايه منه ؟ خصوصا هما حاطين بند لإعادة البيع ولازم يكون عن طريقهم

 

Moataz Ghobara
Sally Awad علشان يمنعوا المتاجرة بالعقار من غير ما ياخدوا عمولة هما كمان… ده فيه بنود كانت في العقد كوميديا من ضمنها اني موافق علي اسقاط حقي في عمل اتحاد ملاك و كمان انه يقدر يغير في البناء و اتجاهه بما يراه

 

محمد الضوي حضرتك ممكن تستفسري من الشركة اذا كانوا يقصدوا توكيل الادارة ولا كل التوكيلات بانواعها بالنسبة لتوكيل الادارة مش من حقهم لانه غير مؤثر عليهم وحضرتك ممكن تعملي توكيل بالتعامل مع الشركة والتعامل مع المرافق الكهربا والمايه والغاز والاتصالات توكيل الادارة غير محظور

 

Sally Awad محمد الضوي
كلام الشركة مش مريحني يعني عاملين البحر طحينة
لكن العقد بيقول اي توكيل خاص

 

محمد الضوي
Sally Awad هما اكيد يقصدوا ممنوع اي توكيل خاص بالتصرف مش بالادارة والتعامل مع الشركة والمرافق لان وارد ان اي ظروف تمنعك من اجراءات معينة فالوكيل يقوم بها بدلا منك

 

Sally Awad اي توكيل خاص سواء بالإدارة او التصرف

 

محمد الضوي
Sally Awad توكيل الادارة والتعامل مش من حقهم ده شرط مخالف

 

Khalid Nassar كيةف تعملى توكيل بالبيع وحضرتك اصلا لم تمتلكى الشقة نهائيا ومعكى توكيل بالبيع للنفس والغير ؟؟؟ شىء طبيعى – حضرتك شاريه شقة بالقسط زةى بالضبط عربية بالقسط تقدرى تبعى العربية الا بعد انتهاء اقساطها ومعكى مخالصة ورخصة بدون حظر ؟؟؟ القانون واضح

 

Sally Awad
Khalid Nassar
مش عاوزة اعمل توكيل بيع .. كل الليهمني توكيل لحد يتولي أمور شاقة كاملة يستلم من الشركة وحتي لو حبيت ابيع يبيع عن طريق الشركة بالنيابة عني . توكيل خاص

 

Khalid Nassar
Sally Awad توكيل ادارة مسموح قانونى — لكن حق البيع لا

 

Abdelhaleem Elnagar نظام البيع بالقسط يمتنع على الشارى بيع الوحده الا بعد سداد تمنها لكن ممكن تعمل توكيل اداره لاى شخص وومكن تعمل توكيل بالبيع للنفس وللغير لاى شخص ويتابع مكانك بتوكسل الاداره بدون ما يعلن انه باعها لحين تسديد الاقساط ويستلم العقد النهائى ومن ثم بالتوكيل يتعامل به عادى بعد اخذ العقد النهائى وطبعا هتسرى على الشارى بنود العقد يعنى لو مثلا هناك رسوم تنازل ونقل ملكيه هيلتزم بها وغيره بما يخص الشقه

 

Fawzy Farag الشرط ده علشان لو حبيتى تبيعى متعمليش توكيل لازم البيع يكون من خلالها علشان كانوا بياخدوا عموله بيع ٢،٥٪؜ بس حاليا الشرط ده التلغى بناء على قانون حمايه المستهلك الأخير لكن توكيل الاداره من حقك

 

Ramy Seif هل في اي بنود تانية تمنعك من مقاضاة الشركة؟؟ .. علشان الصورة توضح نيه الشركة ايه

 

Sally Awad
Ramy Seif
فعلا في بنود غير خاضعة للمحاكم والتقاضي خاصة بفسخ العقد

 

Ayman Selim ما تتسرعيش وتمضي عقد لازم جدااا يكون ف محامى اعرفي من شركات اخري بند موجود ولا شركة ده بس اسئلي ع سابقه اعمال شركة معاد تسليم صيانه راي عملاء سابقين وقرار لكى

 

Sally Awad معاك حق

Ahmed Elbadri ده بند طبيعي موجود في كل عقود المطورين علشان يضمن ان حضرتك او اللي هتتنازليله عن الوحدة يكمل باقي الاقساط
وحضرتك تقدري تبيعي عادي بموافقة الشركة مقابل مصاريف وبيبقا اسمها تنازل عن الوحدة

 

Sally Awad اول مرة اشوفه .. اشتريت شقة قبل كدة واتنين من أصدقائي شارين قريب معندهومش البند ده

Hend Sobhy لا طبعا

 

George Salib أيه يجبرك ؟ هل المطورين الآخرين حاطين نفس الشرط ؟ هما هيدخلوا في النوايا أمنعك تعملي توكيل احسن تستغليه وتبيعي الشقة ؟ طيب وهو مال أهله تعملي توكيل او متعمليش ايه الضرر علي الشركة ؟

Sally Awad مش متأكدة بس هتأكد

 

George Salib كام المصاريف الادارية مقابل التنازل للغير قبل ما تكملي تمن الوحدة ؟

Sally Awad ٣٥ الف

 

Ahmed S Fadel طبيعي ما تقدريش تبيعي الوحدة غير لما تكملي تمنها.

Sally Awad ليه لا ؟ ممكن تتباع عن طريق الشركة وهما سامحين بكدة بعمل تنازل للمشتري الجديد عن طريقهم

 

Ahmed Noby
Sally Awad و الشركه كدا تاخد رسوم كام علي التغير للعقود
و اعتقد حضرتك في العقد مش اخدتي بالك من البند دا في قرأته

 

Ahmed S Fadel
Sally Awad عن طريقهم ممكن

 

Sally Awad الشركة رافضة اي تعامل الا مع المشتري .. حتي لو توكيل بالإدارة
بيقولوا اعملي توكيلات براحتك ..اما لو حد جالي وقالي انه معاه توكيل منك وعايز يستلم الوحدة مش هنسلمة وهنعتبر العقد مفسوخ

 

Sally Awad وواضح انهم موجدين في الجروب هنا لانه بيقولي خمسين واحد رد عليكي وقالولك الشركة معاها حق

 

Få Tmå
Sally Awad حتي لو موجودين هنا انتي ليكي الحق تسالي ف اللي انتي عيزاه مش فلوسك انتي حره طبعا

 

Ahmed Osama Gelo طب اية المشكلة مايبقوا موجودين هو بند غلط طبعا طبعا مفيش كلام ولكن انا بقول الى خلقهم خلق غيرهم عادى جدا هم مش صبور يعنى ولا سوديك عشان يحطوا بند زى دة . وبعدين خلى بالك انا معرفش هى شركة اية وحجم اعمالها يعنى كام فيلا على كام عمارة ولا كومباوندات

 

خالد عوض عادي كلهم كدا

Waleed Lashen رايي انك تستعيني بمحامي افضل واضمن بس يكون محامي ثقة

 

Islam El Deeb يعني أنا مش محامي بس أنا شايف ان المقصود هنا أن التنازل يكون عن طريق الشركة فقط لحين السداد كامل الأقساط ,, المفروض أن ده طبيعي

 

Mahmoud Refaay هما عاملين كده علشان متبعيش الوحده و بعد كده متكمليش باقى اقساطها فا بيضمنوا حقهم .. لازم تسددى كامل الوحده و بعد كده تعملى توكيل .. طول ما فى اقساط عليكى لو حبيتى تبيعى بيبقى اسمها نقل ملكيه فى الشركة .. و لو جيتى تبيعى و انتى عليكى اقساط و المشترى هيدفع كاش ساعتها هيعملولك توكيل و عقد خالص الثمن و من حقك ساعتها تعملى توكيل للمشترى الجديد .. فى الامر طبيعى ..

 

وحيد مراغي طبيعي حضرتك مش هيعملك توكيل قبل متخلصي ثمن الشقه إي حد كده

Sahar Amin يا جماعة هي مش عايزة توكيل من الشركة ومقلتش كده
هي عايزة تعمل توكيل بالإدارة لحد قريبها والشركة رافضة

 

Mohamed Montaser الشركه سامحه بالبيع اللي بيتم عن طريقها لأنها بتستفيد من البيع ده بالحصول على النسبه اللي بيسموها مصاريف إدارية إنما بتمنع انك تعملي توكيل لان بصراحه التوكيل مكن يدخل الشركه في حسابات تاني لو الطرف اللي انتي عملتيه التوكيل في حالة حدوث خلاف بينك وبين اللي عملتيه التوكيل الوكالة في القانون المدني المصري من مادة ٦٩٩

 

Rony Nassif أفرضي لاقدر الله تعبتي او مسافرة وعايزة حد يحل محلك معني كدة انك تتكتفي ؟
معظم الشغالين في دول عربية بيبقوا عاملين توكيل بالإدارة علي الأقل لقرايبهم في مصر علشان يُخلصوا مصالحهم
طبعا متوافقيش والشركات كتير

 

Sally Awad اخر كلام للشركة ان التوكيل اللي ممكن اعمله ممكن يسبيلهم مشاكل في المستقبل .. فهمًا عاوزين يتعاملوا مع العميل اللي اشتري منهم مش اي وكيل عنه
طبعا المهم الشركة تأمن نفسها كويس وتحط كل الشروط اللي تضمن حقها
اما العميل يولع ☹️
طبعا رفضت التوقيع علي العقد وخصوصا ان البند ده جديد مكنش في عقودهم السابقة يعني حاجة تقلق

 

Sally Awad
بصي يا استاذه توكيل البيع للنفس او للغير يعتبر ناقل للملكيه وملكيه حضرتك قبل سداد كامل الثمن تعتبر غير مكتمله وبالتالي لا يحق ليكي تحريره من الاساس .
ثانيا في بعض الشركات بتمنع من خلال عقودها التصرف بدون الرجوع والتوثيق فالشركه مقابل رسوم او مصاريف اداريه او نسبه ايا كان مسماها وده يعتبر من شروط الاذعان في اللي بيقبلها او يرفضها لكن موضوعك انتي يعتبر حق اصيل للشركه

 

Sally Awad
Mahmoud ElSharkawy
مطلبتش توكيل بيع للنفس او الغير

 

Mahmoud ElSharkawy
Sally Awad
حضرتك قولتي الشركه واضعه بند منع من تحرير توكيل خاص بالتصرف والتصرف يشمل البيع والايجار والرهن لكن المتعارف عليه التوكيل بالتصرف هو التوكيل للبيع للنفس او للغير فانا بقول البند ده حق للشركه طالما لم تسددي كامل الثمن وعموما البند يبطل في حاله سدادك لكامل الثمن

 

Sally Awad
Mahmoud ElSharkawy
واضعة بند بمنع اي توكيل خاص حتي لو توكيل بالإدارة

 

Mahmoud ElSharkawy هو تشدد من الشركه بس بردو مفعول البند ده بينتهي بسداد ثمن الوحده وحصولك علي مخالصه او عقد نهائي

 

Mahmoud ElSharkawy ولازم يكون معاكي محامي عند كتابه العقد لا الصياغه مهمه وبتفرق في معني الحقوق والواجبات علي الطرفين

Sally Awad
Mahmoud ElSharkawy
حضرتك مش معقول انتظر 8 سنين معرفش أوكل اي حد وفي اي مشورار لازم اروح بنفسي

 

Mahmoud ElSharkawy يبقي تتفاوضي معاهم علي البند ده وتقصري المنع علي التصرف الخاص بالبيع فقط دون الاداره وكمان حقك في ايجار الوحده دون الرجوع للشركه لو وافقوا نفذي معاهم رفضوا انسحبي

 

Sally Awad
Mahmoud ElSharkawy
بالظبط هو ده اللي طلبته ورفضوا بحجج غريبة ان تعاملهم لازم يكون مع المشتري مش وكيلة لانهم ميضمنوش هوكل مين وحجج فاضية .. عموما انا رفضت التوقيع

 

Mahmoud ElSharkawy تصرفك صح ربنا يوفقك

البحار ماندو سيبك منهم وفيه شركات كتير محترمه في السوق

Ahmed Kadry في حالة بيع ودفع مصاريف هنا يتم البيع عن طريق الشركة العقد بيتعمل ما بين الشركة والطرف الجديد وهنا الشركة بتاخد فقط قيمة الضرائب لو حضرتك اللي جايبه العميل
في حالة الشركة اللس جابت العميل بتاخد عموله بيع +قيمة الضريبة
ايا كان هنا عمليه البيع تتم عن طريق الشركة.

 

Moataz Ghobara
Ahmed Kadry الشركة دورها خلص لما باعت و خلص الموضوع … الشاري يبيع لمين مش دور الشركة انها تدخل نفسها

 

Ahmed Kadry
Moataz Ghobara انا بتكلم في حالة ان الشاري لسه عليه اقسااط

 

Ahmed Kadry
Sally Awad من حق حضرتك تعملي توكيل اداره فقط بكن توميل مكتوب فيه حق البيع ممنوع😩
لان الشاري الاساسي ملوش خق البيع لحين سداد كامل الثمن

 

Sally Awad
Ahmed Kadry
رفضوا توكيل إدارة لاستلام الشقة وتأجيرها والتعامل مع الشركة
رغم ان البند ده مكنش موجود في عقودهم السابقة ،، اكيد في سبب غامض

 

Hesham Elmahrouki يا استاذه لا يجوز عمل توكيل اصلا من اي نوع علي الشقة ودا ليس قرار الشركة وانما الشهر العقاري سوف يرفض عمل توكيل بسبب ان حضرتك لا تمتلك ورق قانوني لعمل التوكيل حتي لو ادارة
الحل هو تفويض يلحق بالعقد

 

Ahmed Kadry
Hesham Elmahrouki ا.هشام
محامي وحد فاهم في العقارات جدا يقدر يفيدكم وكلامه عن ثقة لانه محامي عقاري من مدة كبيرة

 

Hesham Elmahrouki
ازاي المطورين بيبقي معاهم توكيل بالإدارة من صاحب الارض بيتعاملوا بيه مع الجهاز ،، والأرض لِسَّه عليها اقساط ومسددوش تمنها ؟؟؟؟

 

Hesham Elmahrouki
Sahar Amin يا فندم عدم امكانية عمل التوكيل ليس بسبب الاقساط المنع بسبب قانونية الورق

 

Hany Roshdy الأمان والضمان للمشتري ان التنازل والبيع يتم عن طريق الشركة .. حضرتك بتقولي الشركة سامحة بالتنازل إذن التوكيلات غير مجدية