عقود الاذعان العاصمة الادارية الجديدة

في هذه الكبسولة العقارية السريعة أوضح لك تفاصيل عقود الاذعان  العاصمة الادارية الجديدة 

عقود الاذعان  العاصمة الادارية الجديدة 

اولا انا لا خبير عقاري ولا خبير قانوني بس بحكي تجاربي فقط واخطائي لعل حد يستفيد منها 

معظم العقود حاليا عن المطورين هي عقود اذعان 

يعني المطور بيضمن كل حقوقه وانت مالكش اي حق تعترض حتى غرامة التاخير عليه بتبقى كلام فاضي مقارنة بغرامة التاخير عليك لو ملتزمتش بالدفعات 

انا وناس اعرفهم اتعرضوا لمصايب بسبب العقود دي 

ارجوكم اوقفوا الشراء واضغطوا لضمان حقوقكم والله هيستحيبوا  غصب عنهم لان الوضع ده ظلم

مهما كانت الشركة مستقرة فهي معرضة انها يحصلها مشكلة ومفيش شركة مضمونة بنسبة ١٠٠٪؜ واسال نفسك لو الشركة دي مضمونة بنسبة ٩٥٪؜ وده مستحيل ..مش ممكن اكون انا في ال ٥٪؜ الي عندهم مشاكل معاها ؟ 

البروكر هيفضل يقنعك ويزن ان دي فرصة والاسعار هتغلى والوحدات سولد اوت والمطور مسنود من مش عارف منين 

سيبك من الكلام ده .. انت صاحب المشروع .. انت الكاش الي كله بيجري وراه .. الفرص العقارية مش هتخلص ابدا ونصيبك هتاخده 

واول ماتدفع الكاش انت كدة بقيت واحد جديد في السلسلة الي مسكاك من رقبتك ومتقدرش تتفاوض 

يعني ايه بنشتري بدون جدول زمني للانشاءات مرفق بالعقد ؟ 

اسال عن رخصة البناء طلعت ولا لسة 

اربط دفعاتك بالجدول الزمني للانشاءات 

موضة جديدة ان المطور يستلم وديعة الصيانة قبل التسليم ب ٦ شهور ليه مش فاهم ؟ 

اسال عن شركة ادارة المشروع وعقودهم 

زي ما عليك غرامة تاخير لازم تتساوى بغرامة تاخيرهم بنفس النسبة 

بند بحبس الاقساط واسترداد الشيكات والمقدم في حالة التاخر عن ٦ شهور مثلا عن الجدول الزمني للمشروع

والله اعرف ناس عمالة تدفع فلوس في مشاريع مش هتطلع اصلا ومش عارفين يوقفوا الشيكات 

انت اكتر واحد ادرى بمصلحته ومفيش حد هيخاف على مصلحتك الا انت وخليك قد مسئولية ان دي فلوسك وفلوس عائلتك كلها وكلهم في رقبتك 

واي حد يحاول يضغط عليك اعرف انه بيدور على مصلحته هو

في الختام...

يمكنك دائماً تصفح قسم كبسولة عقارية من يوفن دوت كوم، للإجابة علي اسئلتك العقارية سريعاً وبشكل موجز ومختصر!

أو يمكنك دائماً التواصل معنا للإجابة عن أستفسارتك بكل شفافية ومصداقية لأستثمار آمن...